Makina bat pertsona igaroko ziren inoiz Munoaundi mendixkako Burdin Aroko herri harresituaren gainetik, zapaldutako lurzoruaren azpian duela 2.500 urte inguruko gizakiaren arrasto argigarriak egon daitezkeela pentsatu gabe. Etengabeko galderei tiraka, Aranzadi zientzia elkarteko kideak herri antolatu haren arrastoen bila aritzen dira duela 21 urtetik, eta aurten ere ez dute hutsik egin aztarnategiko indusketek. Iraileko Azkoitia Guka aldizkarian argitaratutako 'Klik!' argazki erreportajea da honako hau.

Azkoitian askok dute herriko eraikin historikoen berri, baina bada bat ezkutuan, gordeta, mantentzen dena: Altuna Portu etxea. Jausoro auzotik begiratuta, Urola ibaiaz bestalde dago etxe hori, errepidearen gainaldean. 1722. urtean Manuel Ignacio Altuna Portu jaio zenean hartu zuen etxe horrek egun duen izena, baina, aurrez, beste izen batzuk ere izan zituen.