Azkoitiko Udalak 132.000 euro bideratuko ditu bi arlo horietako elkarteentzako diru laguntzetara, eta ohiko egitasmoak ez ezik, beste zenbait ere sustatuko ditu. Elkarteek ez ezik, ekintzaren bat antolatzen dutenek edo Arabatik, Bizkaitik eta Gipuzkoatik kanpo jokatzen den kirol txapelketaren batean parte hartzen dutenek ere egin ditzakete eskaerak, baita irabazi asmorik gabeko taldeek ere.

Udalaren deialdien artean, Euskara sailak zabaldu du berea. Enpresetan euskara planak sustatzeko, euskara ikasteko, EHUren zein UEUren ikastaroetara joateko edota saltoki zein enpresetan euskararen presentzia indartzeko hainbat diru laguntza emango ditu.