Azkoitiko San Martin auzoaren izanari buruzko dokumentalaren emanaldiak bildu zituen atzo ehundik gora lagun Baztartxo antzokian. Auzo horren historia ez ezik, auzotarren bizipenak ere jaso dituzte Javier Beristainek eta Mari Karmen Elorzak ikus-entzunezkoan, eta atzo izan zen haren estreinaldia –auzotarrek abenduan ikusi ahal izan zuten lana, Elkargunean–. Hain zuzen ere, auzoa sortu zela 100 urte betetzen direlako egin dute ikus-entzunezkoa.
Emanaldiaren aurretik hitza hartu zuten lanaren egileek, eta haiek eskerrak eman zizkieten partaide guztiei; orotara, 23 lagun aritu baitira, era batera edo bestera, dokumentala ontzen. Halaber, ikus-entzunezkoa egiteko prozesua azaldu zuten horiek, baita San Martin auzoaren sorreratik gaur egunera arteko historia ere.
San Martin auzoan jaiotako Beristainek eta Elorzak dokumentala garatzeko bidelagun izan dituzte Monika Torres irudigilea eta Joseba Beristain musikaria; hain zuzen ere, horiek denek egindako lanaren emaitza da San Martin auzoko bizilagunentzat egin duten lana.
