Aurtengo San Andres egunak ez du iazkoren antzik izan; aurten igandez eta eguraldi tristearekin esnatu da Azkoitia azaroaren 30ean. Hala eta guztiz ere, herritarrek ez dute hutsik egin, eta egunari ukitua emanez, urteko jairik berezienetakoa ospatzen ari dira.
Azken urteetan gero eta herritar gehiago ateratzen da kalera baserritar jantzia jantzita, eta gaur ere dotore atera dira asko. Ordea, festa egiteko batzuk lan egin behar; taloak egin eta egin jardun dute plazako arkupetan herriko hainbat eragilek. Dena den, guztiek asmatu dute gaurko eguna ospatzen.
Ikurrinaren plazan gaur beste urteetan baino jende gutxiago izan da. Ikusmin handia piztu ohi dute San Andres eguneko txerriek eta oiloek, baina animalien azokak egiteko debekua dela eta, aurten ez da izan ganadurik kalean. Animalien partez, herri kirolak izan dira plazan, artisauak Plazaberrin nahiz eliz atarian, eta herri guztian zehar haurrak, marrazkiak egiten.
