San Andres eguna da gaur, azaroaren 30a. Bustitik esnatu da herria goizean goizetik; ordea, zabaldu dira ostarte batzuk ere tarteka, eta azkoitiarrek hartu diote neurria eguraldiari. Giro ezin hobean ari dira ospatzen herrian horren berezia den eguna. Aurtengo San Andres egun hau berezia ari da izaten; behien artean zabaldu den dermatosi nodular kutsakorra dela eta, erakundeek ez baitute eman baimenik txerriak eta oiloak Ikurrinaren plazara eramateko. Hori hala, aurtengoa animaliarik gabeko San Andres eguna ari da izaten.
Animaliarik gabe izan arren, festarako aukera handia izan da gaur ere herrian. Eliz atarian eta Plazaberrian dozenaka artisauk jarri dituzte postuak, eta egunaren lehen ordutik atera dira zenbait herritar azokara erosketak egitera. Dena den, gaur ere plaza izan da herritarren festarako bilgune nagusia, hango arkupeetan jarri dituzte-eta jan-edanerako postuak hainbat eragilek. Azkoitia BHIk, Floreaga ikastetxeak, Azpeitiko Ikasberri ikastolak eta Presoen Lagunek izango dituzte han postuak iluntzera bitartean. Mugimendua sortzea apur bat kostatu bada ere, eguerditik aurrera gainezka ziren postu guzti-guztiak.
Musikak ere ez du hutsik egin. Herriko trikitilariak kalerik kale ibili dira, eta Txalkor txistulari taldekoak Azpeitiko eta Mendaroko (Gipuzkoa) txistulariekin batera atera dira kalera. Musikarekin batera, haurren marrazkiak izan ohi dira gaurko egunez protagonista. Ehunka umek parte hartu dute Txuri Urdin elkarteak antolatutako marrazki lehiaketan. Herrian zehar sakabanatuta ikusi dira umeak txoko eta gune berezienak marrazten; kalean ez bezala, marrazkietan ikusi dira bai animaliak, orrialde zurietan ohikoa izaten baita txerria marraztea. 12:00etan entregatu dituzte haiek beren lanak Berdura Plazan, eta 14:00etan saritu dituzte plazan. Ondoren, irabazleen marrazkiak Etxebeltz eraikinaren erakusketa aretoan jarri dituzte ikusgai.
Eguerdiarekin batera hasi da herriko plazan herri kirol jaialdia. Harria jasotzen Olaia Esnaola, Udane Ostolaza, Jon Unanue Goenatxo III.a eta Xabier Aranburu Guzta aritu dira. Aizkoran, berriz, Julen Alberdi Txikia IV.a eta Ugaitz Mugertza. Hesien bestaldean ere jendetza bildu da kirolarien erakustaldia ikusteko.
Pilota eta erromeria
Goiz parteko ekintzak amaituta, 16:00etan, berriz, Oteiza pilota elkarteak antolatutako Kontzejupe frontoiko txapelketaren 51. aldiko finalak jokatuko dituzte. Guztira, zazpi final jokatuko dituzte han eskuz binaka. Eguna ixteko, berriz, Joxe Mendizabalek eskainiko du erromeria; 20:00etan hasiko da haren saioa, plazan. Hona hemen gaurko eguna osatzeko falta diren egintzak:
Gaur, San Andres eguna:
- 16:00. 51. Kontzejupe Sariaren azken partidak Kontzejupean, Oteiza pilota elkarteak antolatuta.
- 20:00. Joxe Mendizabalekin erromeria, plazan.
(Argazkiak: Andoni Elduaien eta udala)