Organo Erromantikoaren Nazioarteko XXV. Zikloaren barruko hirugarren eta azken kontzertua hartu zuen atzo iluntzean Andre Mariaren Jasokundearen parrokiak. Zikloa datorren ostiralean bukatuko da, Loiolan, baina aurtengoan Azkoitian programatutakoak atzokoarekin osatu ziren.
Aurreko bi hitzorduetan, organo doinuak ahotsekin uztartuta eman bazituzten –Mikel Ansolak Dos-i taldearekin eta Loreto Fernandezek Ainhoa Zubillaga mezzosopranoarekin–, atzo bakarrik aritu zen Nathan Laube organo jotzaile estatubatuarra parrokian. Lefebure-Welyren, Durufleren eta Liszten musika entzuteko aukera izan zuten haren eskutik atzo parrokian elkartutakoek.