Kirola egiteko modu asko daude, kirol motak ere ugari, baina ohitura osasuntsuak ez alboratzeko gakoa da norberak gustuko duena egitea. Indarra, erresistentzia, abiadura eta dibertsioa uztartzen dituzten bi diziplina izango dituzte hizpide Bizi On! saioaren bigarren denboraldiko hirugarren atal honetan: Hybrid Race eta Zumba. Horrez gain, errendimendua handitzeko une bakoitzean zer jatea komeni den azalduko du nutrizionista batek; kirolak bihotzari eragin diezazkiokeen onurez eta kalteez jardungo du, berriz, kardiologo batek, eta hura zaintzeko aholkuak ere emango ditu.
Boxeoa eta wushua, borroka kirolak dira biak, baina oso desberdinak euren artean. Wushua inork gutxik ezagutzen du; boxeoa, ostera, borroka kirolen esparruko diziplinarik ezagunena da, gero eta zale gehiagorekin. Orioko River Box&Roll klubeko entrenatzaile Ibai Marinek kirol horrek gorputzerako zein bururako dituen onurez jardungo du Bizi On! saioaren atal honetan, eta horretan sakonduko dute kontsulta Azpeitian duten Elene Urbieta eta Ioana Pickford psikologo azkoitiarrek; emozioak kudeatzeko garaian kirola egitea zeinen lagungarri izan daitekeen azaldu dute.
Bizikleta gaineko biomekanika, mendiko bizikleta jaitsierak eta jaitsieretan ohikoenak diren lesioak izango dituzte hizpide Bizi On! saioaren bigarren denboraldiko lehen atal honetan. Besteak beste, Azpeitiko Arauntza eta YK Riders taldeko Iñigo Garcia, Naroa Aranbarri eta Asier Leon, eta Aitor Oteiza fisioterapeuta azkoitiarra dira atal honetako protagonistak. Bizi On! saioa, sei astez, asteartero, 19:00etan, Gukan.