Albistegia

Dermatosi nodular kutsakorraren aurka 42.500 abelburu txertatzea aurreikusi dute, eta aurrenekoak gaur eguerdian txertatu dituzte Aiako testaje zentroan. Izan ere, gaur sartu da indarrean nahitaezko txertaketa ezartzen duen foru agindua, eta horri buruzko azalpenak eman ditu prentsaurrean Xabier Arruti Lurralde Oreka Berdeko diputatuak. 

Gabonek opariak jaso eta egiteko ohitura zabala da. Eskualdeko etxeetara Olentzero, Errege Magoak, Bizar Zuri edo lagun ezkutuak iritsi daitezke: Baina poltsikoari begiratzeko unea ere izaten da; orokorrean, gastu ekonomiko handiak egiten dira eta data hauetan.

Erritual zaharrei eutsi edota berriak sortzeko balio dezakete Gabonak. Batzuei asko eta besteei oso gutxi gustatzen zaizkien ospakizunak izaten dira. Baina familia ereduak aldatzearekin batera, Gabonak ospatzeko ereduak ere anitzak izan daitezke.

Parrokiako Taldeak Israel Gazan egiten ari den sarraskia gogoan izan du aurtengo jaiotza atontzerako orduan. Urtarrilaren 6ra arte egongo da ikusgai, eta Gabon garaian egunero zabalduko dute parrokia.

Gabonak bizitzeko hamaika modu daude, eta batzuei asko eta besteei oso gutxi gustatzen zaizkien festak dira. Jan-edanaren kulturari lotutako jaiak dira, eta ohikoa baino jateko gehiago saltzen da saltokietan. Batzuek aurrez erosten dituzte elikagaiak, besteek azken unean. Eskualdeko bizilagunek gabonetako otorduetarako dituzten ohiturak ezagutzeko asmoz kalera atera da Guka Eguberrien atarian.

Datuek diote azken zortzi urteotan %30etik gora hazi direla Urola Kostako herritarren eta familien batez besteko errentak. Baina zenbat garestitu da bizimodua? Zailtasunik izaten al dute hilaren bukaerara iristeko? Lehen baino gehiago edo gutxiago? Guka kalera atera da herritarrei galdetzera.  

Egungo sindikalismo ereduarekin ados ez dauden hainbat nekazarik eta abeltzainek sortu dute Baserritar Bilgunea sindikatua. Herriz herri aurkezpenak egiten ari dira, eta astelehen arratsaldean Zarauzko Merkatu Plazan izan ziren.

Abarketatxo ludotekako eta Artxamendi topalekuko umeek eta gaztetxoek bi erraldoi egin dituzte, euskal kultura lantzeko gauzatu duten proiektuari bukaera emanez: Pako Pako eta Zakel Mari. Ostiralean aurkeztu zituzten Azkoitiarekin lotura duten bi pertsonaiak irudikatzen dituzten erraldoiak, eta horiekin kalejira egin zuten.

Atzo iluntzean egin zuten danborradako konpainiek azken entsegua. Izarraitz taldea izango da aurtengo urteko berrikuntza nagusia, eta talde horren bi zuzendariekin, Aldapa taldeko danbor jotzaile batekin eta Ixkitturri elkarteko kantinerekin hitz egin du Gukak. 

Gaur egungo gazteek ez zuten bizi izan Francoren diktadura, baina zer dakite aldi hari buruz? Herritar hainbaten iritziak jaso ditu Gukak, datuek diotenez, gizartean eskuin muturreko ideiek gora egin duten honetan.

1975eko azaroaren 20an eman zuen Arias Navarro orduko Espainiako presidenteak Franco diktadorea hil zela zioen berria. Herritarren artean poza eta esperantza sortu zituen telebistan emandako mezu labur hark. Eskualdeko herritar hainbatek egun hura nola oroitzen duten jaso du Gukak.

Jose Luis Frantsesena organo jotzaile azpeitiarra omendu zuten atzo, zapatua, Azkoitian. Atzoko egunez bete zituen musikariak 25 urte Azkoitiko Andre Mariaren Jasokundeko parrokian dagoen Cavaille-Coll organoan. Hain justu, aurreneko kontzertua eman zuen egun bera baliatu zuen Frantsesenak atzo, 25. urteurreneko kontzertua eskaintzeko; Mariatxen Urkia sopranoarekin batera aritu zen hura, eta jendetza elkartu zuen emanaldiak. 

Guka Telebistak gaur gauean estreinatuko du Dabilen harriari saioaren bigarren denboraldia, eta datozen hamar asteetan, asteartero, 22:00etan, atal berri bat izango da ikusgai. 

Garikoitz Mendizabal txistulariak, Azkoitiko Musika Bandak, Txalkor txistulari elkarteak kontzertua eskaini dute Kontzejupean, eta amaieran, Txomin Mujika konposatzaileak Angel Mari Arenasi eskaini dion abestia taularatu dute aurrenekoz. Hunkituta jaso du aitortza. 

"Berehalako konponbidea" eskatu dute Juaristi eta Aitek lantegietako beharginek gaur arratsaldean egindako manifestazioan. Herriko plazatik abiatuta, hainbat kale zeharkatu dituzte langileek eta haiei babesa ematera protestara batu direnek. Langileek ozen aldarrikatu dituzte beren aldarriak, eta bi enpresen gerentzia partekatzen duen nagusiari negoziatzera esertzeko eskatu diete.