Maiatzaren 15etik 25era egingo den Euskaraldian parte hartzeko izen-ematea zabalik da, eta Azkoitiko Udalak jakinarazi duenez, orain arte 761 lagunek eman dute izena Azkoitian; horietatik 718 ahobizi izango dira, eta 43 belarriprest.
Internetez eman daiteke izena, www.euskaraldia.eus webgunean, baina aurrez aurre ere egin daiteke herriko honako leku hauetan: udaletxearen sarreran eta Elkargunean. Batean zein bestean, galdetegi bat bete beharko dute herritarrek, eta ondoren hango kutxetan utzi.
Erakundeak Euskaraldian izena emateko garrantzia azpimarratu du, ariketa sozial horrek herritarren hizkuntza praktikak aktibatzea zein euskararen erabilera handitzea duelako xede.
Era berean, Euskaraldia Hikan ere parte hartuko du Azkoitiak, eta herritarrek egitasmo horretan ere izena emateko aukera dute galdetegia betetzerakoan. Ahobizi edo belarriprest rolari dagokion txapa jasotzerakoan, Euskaraldia Hikan izena eman duten herritarrek H pegatina ere jasoko dute. Zera esan nahi du pegatina horrek: "Nahi baduzu, nirekin hika egin dezakezu”. Horretarako, ez dago hitanoa jakin beharrik, norberak ikasi edo entzun nahi izatea nahikoa da.