Gipuzkoako eskolarteko zonaldeko txapelketa jokatu zuten joan zen igandean Anaitasuna Kakute xake taldeak duen egoitzan, eta hiru kategoria lehiatu ziren bertan: infantilak (2011-2012), alebinak (2013-2014) eta benjaminak (2015-2016).
Infantiletan, Julen Azpillaga azpeitiarra nagusitu zen puntu guztiak batuta, eta horrenbestez, zuzenean sailkatu zen maiatzean Donostian jokatuko den finalera. Alaitz Hidalgo azkoitiarra bigarren sailkatu zen txapelketa ona eginda, baina partida on batek ihes egin zion, eta hiru punturekin amaitu zuen, bere ibilbidean aurrera doan Mikel Arriola azkoitiarrak bezala.
Alebinetan, Jon Arregi oñatiarra nagusitu zen, eta hark Mikel Saenezekin (Eibar) eta Alex Franconekin (Azpeitia) batera lau puntu eskuratu zituen. Aurreneko postua berdinketa onena hausteko partida irabazi zuenak lortu zuen, eta hura ere zuzenean sailkatu zen Donostiara. Erik Fernandez azkoitiarrak laugarren egin zuen hiru punturekin, eta Ekain Aldalurrek ezin izan zuen bere talentua erakutsi, gau txarra pasatu izanagatik, txapelketara aurkeztu bazen ere. Gipuzkoako zonaldetako txapelketak duen parte hartzearen arabera, Gipuzkoako Federazioak bigarren aukeran har dezake jokalariren bat.
Benjaminei, berriz, igandean amaitu zitzaien txapelketaren ibilbidea, haiek ezin baitute zonaldeko finaletan parte hartu. Ekaitz Apraiz oñatiarra izan zen garaile, bost puntu lortuta eta beste jokalariei aukerarik eman gabe. Anaitasuna Kakute taldeko kide den Luken Pascual zestoarrak sailkapeneko bigarren postua lortu zuen, 3,5 puntu batuta.
Finean, goiz oso polita eta hunkigarria igaro genuen, jokalariek ederki pasatu zuten, eta haiek zoriontsu ikusten gozatu zuten gurasoek ere. Arbitroek ere lan ona egin zuten, eta txantxa artean, jokalariei irakasteko tartea hartu zuten. Erakunde, enpresa eta merkatari guztiak eskertu nahi ditugu, urte osoan babesten gaituztelako, eta horren emaitza direlako igandeko saioak bezalakoak.