Frantzia ez da Espainia, ordea. Frantzian zutik dira poliziak ere. Protesta egiteko batu dira, non eta Errepublikaren plazan, ez noski lan erreformaren aurka, baina aldarri egin nahi dute hala ere, profesionalak baitira: agindu egokiak eskatzen dituzte errepresioan, salatu egin nahi dituzte euren kontrako azkenaldiko jazarraldiak.
Alde, telebistetako irudiak dituzte: hagaz armaturiko manifestari kaskodunak, molotov koktel bat autoa kiskaltzen. Kontra, poliziaren kontrako kultura atabikoa, han-hemenka urtez urte zamatu dena: hasi karabineroen txisteetatik, segi diktaduretako ankerkeriaren teknika patologikoetatik eta buka, esaterako, Frantzian bertan, Themroc filmarekin, oilo baten zangoa Michel Piccoli kanibal urbanoaren ahutza artean.
Gaua zutik eman dute, auskalo zenbatek, auskalo zenbagarrenez, Hollanderen lan-erreforma eraisteko. Eta gauaren begian ez da zaila Espainian urte batzuk lehenago gertatutakoaren itzalak ikustea. El Khomri ministroaren legeak antzekotasun handiak ditu aurretik Rajoyk onartutakoekin. Plazetako asanbladek zer ekarri zuten, badakigu.
Azkoitia Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.
Izan Gukakide
Izan Gukakide