Erniarraitzek joan den zapatuan Barakaldon ekin zion Bertsotruk ekimenaren baitan egingo duen bideari. Bertan bildu ziren hiru bertso-eskola hauetaz gain Busturialdeko bertso-eskolako kideak ere, guztira 30 lagun inguru. Aukera ederra izan zute goizean egindako bertso-poteoan eta bazkalondoreneko desafio saioan elkarren berri izateko. Hau hasi baino ez da egin, oraindik bide luzea dute topaketa bakoitza festarako aitzakitzat hartuta bertsoaz eta bertso-eskolez gozatzeko.
Euskal Herriko Bertso Eskolen Batzordetik ateratako proposamena da Bertsotruk. Euskal Herri osoko 26 bertso-eskola ari dira parte hartzen, eta tartean da Erniarraitz. Bere multzo berean daude Iparraldeko bertso-eskola eta Enkarterriko bertso-eskola, eta maiatzera bitartean bakoitzarekin bina saio egin eta elkar ezagutzea izango da helburua.
