Xabier Artetxek Realean segituko du datorren denboraldian ere. Gukak baieztatu ahal izan duenez, Mikel Labakak gidatuko duen Realaren jubenilen lehen taldeko bigarren entrenatzailea izango da azkoitiarra 2026-2027 denboraldian. Ondorioz, azpeitiar eta azkoitiar bana izango dira taldearen gidaritzan.
Lehen ere postu horretan aritutakoa da Artetxe. Izan ere, 2024an batu zen talde txuri-urdinera, jubenilen A taldeko bigarren entrenatzaile lanetara. Bukatu berri den denboraldian, berriz, jubenilen bigarren taldeko entrenatzaile izan da, eta atzera lehen taldera itzuliko da. Artetxek badu eskarmentua entrenatzaile lanetan, sei denboralditan izan baitzen Anaitasunako gizonen talde nagusiko gidaria.