Gipuzkoako Karate Federazioak antolatuta, zonaldeko eskolarteko karate probak jokatu dituzte gaur, igandea, Elkarguneko kantxa nagusian. Azkoitiko eta inguruko zenbait herritatako karateka txikienak eta haien irakasleak elkartu dira han, eta maila dotorea erakutsi dute guztiek. Benjaminen, kimuen eta haurren mailako neska-mutilak aritu dira kumite eta kata modalitateetan beren abileziak erakusten.
Goizeko saioan, gainera, berriki zendu den Rita Juaristi gogoan izan dute. Duela egun gutxi hil zen urte luzez Juan Murillorekin batera Anaitasuna Kanku karate eskolaren gidari izan zen azkoitiarra. Minutuko isilunea egin dute Juaristi zenaren alde, eta bidez batez, karatearen eta eskola kirolaren alde egindako lan guztia aitortu diote hari. Ekitaldian parte hartu dute Gipuzkoako Karate Federazioko ordezkariek, Ana Azkoitia alkateak, Igor Isuskiza Kirol zinegotziak eta EH Bilduko Asier Altunak nahiz Nagore Orbeak.