Euskaltzaleek bat egingo dute hilaren 31n, larunbatez, Azkoitian, AEK-k prestatu duen Zapatu Laranja egun osoko egitasmoari esker. Horren atarian eta girotzen hasteko, gainera, serigrafia tailerra prestatu du erakundeak datorren astearterako, udalaren laguntzarekin.
Datorren asteartean, Matadeixen elkartuko dira kamisetak serigrafiatzeko: goizean, 10:00etatik 13:00etara eta arratsaldean, 16:00etatik 18:00etara. Parte hartzaile bakoitzak bere kamiseta eraman beharko du hara, eta antolatzaileek nikia zuria edo beltza izatea gomendatu dute.
Zapatuan, egun osoko festa
Larunbatean, bestalde, egun osoko festa izango da Azkoitiko plazan, AEKren eskutik: 10:00etan, murala margotuko dute bertaratzen diren guztiek, Michele Abrego artistaren laguntzarekin; 12:00etan, txupinazoa eta pregoia izango dira, eta ordu erdira Asier Kidam magoaren ikuskizuna hasiko da. 14:30ean, berriz, euskaltzaleak bazkaltzeko bilduko dira, eta otordura joateko sarrerak dagoeneko eros daitezke AEK euskaltegian, Lujan saltokian eta Dean tabernan, bost eurotan. Horrez gain, 18:30etik aurrera Gotx elektrotxarangak girotuko ditu herriko kaleak.