Gaur hasi da Euskaraldia, eta maiatzaren 25era bitartean gauzatuko da euskararen erabilera sustatzea helburu duen ariketa soziala. Gukak, egitasmoarekin bat egiteaz gain, lanketa berezia egingo du egunotan. Alde batetik, maiatzeko aldizkariekin batera Euskaraldiari buruzko gehigarri berezia kaleratu zuen; bestetik, egitasmoak iraungo duen 11 egunotan Urola Kostan egingo dituzten ekitaldien eta jardueren inguruko informazio xehea helaraziko die herritarrei; eta horrez gain, Arnasa estu izenburupean, hainbat erreportaje eta elkarrizketa argitaratuko ditu egunkarian zein webguneetan, bihar hasita.
Eskualdean euskararen egoera nolakoa den azaltzea, euskararentzat mehatxu nagusiak zeintzuk diren identifikatzea eta horiei aurre nola egin aztertzea da Arnasa estu-ren helburua, eta erreportaje eta elkarrizketa sorta mahai inguru batekin borobilduko du Gukak. Telebista saioa Ihintza Elustondo kazetariak gidatuko du, eta Iñaki Iurrebaso UEMAko ikerlariak, Amelia Barquin Mondragon Unibertsitateko irakasleak eta Xabier Euzkitze kazetari eta euskaltzaleak parte hartuko dute saioan. Maiatzaren 25ean, igandez, ikusi ahal izango da solasaldia Guka Telebistan, 21:00etan hasita, eta hurrengo egunetik aurrera saioa osorik ikusgai izango da Gukaren webgune guztietan.