Pentsiodunen HELaren aldeko sinadurak jasoko dituzte larunbat goizean

Ane Olaizola 2025ko api. 3a, 15:57

Pentsiodunak sinadurak biltzen otsailean, eliz atarian. (Nerea Uranga)

10:00etatik 12:00etara eliz atarian izango dira sinadurak jasotzen, eta euria egiten badu, Kontzejupera lekualdatuko dira. 18 urtetik gorako pertsona guztiek sina dezakete Euskal Herriko Pentsiodunen Mugimenduaren lege proposamena.

Pentsioen Herri Ekinaldi Legegilea (HEL) Eusko Legebiltzarrean eztabaidatu eta bozka dezaten, Euskal Herriko Pentsiodunen Mugimendua sinadurak biltzen ari da herriz herri, eta datorren larunbatean, herritarrek atximendua emateko aukera izango dute Azkoitian. Izan ere, 10:00etatik 12:00etara artean, sinadurak biltzeko mahaia jarriko dute pentsiodunek eliz atarian. Euria eginez gero, ordea, Kontzejupean egongo dira horretan. 

Euskal Herriko Pentsiodunen Mugimendua (EHPM) pentsioak osatzeko sistema bat sortzeko lanean ari da, 60 urtetik gorako pentsiodunei Lanbide arteko Gutxieneko Soldataren (LGS) pareko diru sarrerak bermatzeko.

Arabako, Bizkaiko eta Gipuzkoako 18 urtetik gorako pertsona guztiek sina dezakete Euskal Herriko Pentsiodunen Mugimenduaren lege proposamena, eta sustatzaileek aukera duten herritar guztiak gonbidatu dituzte horretara, "denen mesederako" izango delakoan. Sinatzerakoan beharrezkoa izango da Nortasun Agiria eramatea.

Azkoitia Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.


Izan Gukakide