Etzi, igandea, Taldez Talde egitasmoaren bigarren emanaldia izango da Kontzejupean. 12:30ean hasita, Azkoitiko Musika Bandako eta Bizkargi eskolako banda gaztea ariko dira jendaurrean. Banda bakoitza bakarka nahiz biak batera ikusteko aukera izango dute herritarrek; izan ere, estilo askotariko piezak eskainiko dituzte musikariek.
Banda gazteak Hompeh march, You are my sunshine, Sk8er Boi eta Witch doctor abestiak eskainiko ditu, eta Azkoitiko Musika Bandak Laboakadak, The Eightiers eta Coldplay on stage abestiak. Bi bandak batera ere arituko dira, eta orduan The lion king, Aldapeko eta Ikusi mendizaleak abestiak joko dituzte.
Joan den astean hasi ziren Taldez Talde emanaldiak, euskal musikak eta dantzak aurkezteko. Datorren asteko igandekoa izango da aurtengo hirugarren eta azken emanaldia; Iraurgi eta Bizkargi abesbatzen emanaldia izango da orduan.