Mila aurpegiko gaixotasuna dela esaten zaio esklerosi anizkoitzari, eta mila aurpegiko elkartasun keinua izan da gaur arratsaldean Azkoitian ikusi izan dena. Bosgarrenez, herritarrek kaleak bete dituzte Ttipi-Ttapak antolatzen duen V. Lasterketa Solidarioan, eta guztira, 900 haur eta helduk erantzun diote taldeari deialdiari.
Goizeko jolas inklusiboen ostean, 17:00etan hasi dira elkartasun lasterketak herriko plazan. Adinka banatuta egin dute antxintxika dozenaka umek, eta haien txanda eta gero iritsi da lasterketa nagusia. Betekada hartu du plazak 18:00ak jotzerako, eta txistua jo ostean hasi da elkartasun uholdea; batzuk oinez eta besteak korrika, giroa paregabea izan da herriko kaleetan. Sailkapenik gabeko lasterketan, elkartasuna izan da irabazle beste urte batez, eta izen-emateetatik jasotako dirua Ademgi Gipuzkoako Esklerosi Anizkoitzaren Elkartearentzat izango da aurten.
