Joan den astean Gipuzkoako Lehen Mailara igotzea lortu zuen Tta-kun areto futbol taldeak, Legorreta taldearen aurka 2-2 berdinduta. Ondorioz, datorren denboraldian maila bat gorago jokatuko du Azkoitiko taldeak. Lorpen hori aitortzeko eta taldea aurrez aurre zoriontzeko, Azkoitiko Udalak harrera egingo die taldekideei bihar, 19:00etan.
Ana Azkoitia alkateak udaletxean egingo die harrera aurrena, eta taldekideak udaletxeko balkoira aterako dira ondoren, zaleak zein herritarrak agurtzera eta haien berotasuna jasotzera. Udalak herritar oro herriko plazan elkartzera animatu du, taldearen lorpenak ospatu ahal izateko.
Oñatitik bueltan izango da harrera. Izan ere, Gipuzkoako Bigarren Mailako ligaren finala jokatuko du Tta-kunek bihar hango kiroldegian, Donostiako Makax taldearen aurka. Azkoitiko taldeak Bigarren Mailako txapela bereganatzeko aukera izango du han.
