ArtHaziak

'ArtHaziak' saioko seigarren eskulana: Txitxirioak jaten dituen txita

Erredakzioa 2024ko api. 4a, 15:00

Pazko Astearekin batera 'ArtHaziak' saio berria estreinatu du Gukak. Mireia Galarza Bastidak gidatzen du saioa, eta hainbat eskulan ari da egiten bertan. Seigarren atalean, txitxirioak jaten dituen txita egingo du aurkezleak.  

Artearen hazia ereiteko asmoz, ArtHaziak ikus-entzunezko saioa eskaintzen ari da Guka bere hedabide guztietan aste honetan zehar. Eskulan saioa da, eta guztira zortzi eskulan egin ahalko dira ArtHaziak saioak jarraituta: igela, tigrea, mikroskopioa, garaikurra, animaliak, txita, martetarrak eta suziriak.

Saio horiek 5 urtetik gorako umeei zuzenduta daude, eta apirilaren 2tik 5era bitartean ikusi ahal izango dira Erlo Telebistan eta Gukaren webgune guztietan, 15:00etan: maxixatzen.eus, uztarria.eus, baleike.eus, karkara.eus, zarauzkohitza.eus eta urolakosta.hitza.eus atarietan, hain zuzen ere. Ordu berean Erlo Telebistan ere ikusi ahal izango dira ikus-entzunezkoak. 

Mireia Galarza Bastida aurkezleak gidatuko ditu saioak, eta eskulan bakoitza pausoz pauso nola egin behar den azalduko du ikus-entzunezko bakoitzean. Seigarren eskulanean, txitxirioak jaten dituen txita egingo du aurkezleak, eta honako osagaiak erabiliko ditu: kaxa baten estalkia, txitaren irudia, kola beroa, txitxirioak, kuterra, plastikozko botila huts bat eta arkatza. 

Azkoitia Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.


Izan Gukakide