Gauez Korrikara batzen diren herritarrei arduraz jokatzeko eta segurtasun neurriak hartzeko eskatu die AEK-k. Euskararen aldeko lasterketan ilunpetan aterako direla kontuan izanda, txaleko islatzailea jazteko edo, behintzat, argiren bat eramateko gomendioa luzatu die elkarteak.
Atzo, igandea, hiru pertsona zauritu ziren Mendigorrian (Nafarroa), Korrikaren furgonetak harrapatuta. Horrenbestez, Korrikaren antolatzaileek furgonetatik gertu zuhurtziaz jokatzeko eskatu die parte-hartzaileei, are gehiago, gauez aterako badira.
Asteazken goizaldean sartuko da Korrika eskualdera, Oriotik barna. Gauerdia baino minutu batzuk lehenago hartuko dute lekukoa oriotarrek usurbildarren eskutik, eta jarraian eskualdean barna egingo du: Orio, Zarautz, Getaria, Zumaia, Aizarnazabal, Zestoa, Azpeitia eta Azkoitia zeharkatuko ditu, hurrenkera horretan. Goizeko 05:30 aldera igaroko da Azkoititik. Ondorioz, ilunpetan igaroko da Korrika eskualdetik, eta argiztapen neurriak hartzea beharrezkotzat jo dute antolatzaileek.