Zubiaurre igeriketa klubak datozen egunetan hasiko du denboraldi berria, eta datorren ikasturteko antolaketaren nondik norakoak familiei azaltzeko, hainbat bilera antolatu ditu etzirako, irailak 8. Guztira, bi bilera egingo ditu igeriketa klubak: aurrena, izena aurrenekoz eman dutenei zuzendutakoa izango da; bigarrena, eguerdi partean entrenatzera joaten direnei.
Aurten lehenengoz izena eman dutenekin 17:30ean egingo dute bilera Zubiaurreko kirol arduradunek, Elkarguneko Herriko plaza aretoan. Bertan, igeriketa klubaren nondik norakoak azaldu eta funtzionamenduaren inguruko xehetasunak emango zaizkie gurasoei eta tutoreei. Era berean, izen-emate orriak bete eta seme-alabei egokitutako taldeak nahiz ordutegiak jakinaraziko ditu klubak.
Gurasoek, beraien aldetik, aukera izango dute dituzten zalantza guztiak galdetzeko eta arduradunen taldea ezagutzeko. Nahi duenak aukera du oraindik izena emateko; 2019an jaiotakoak (edo zaharragoak) has daitezke aurten igeri eskolan.
Eguerdian entrenatzen dutenei zuzenduta egongo da bigarren bilera, egun berean, baina oraindik zehaztu gabe daude ordua eta lekua. Zubiaurreko arduradunek jakinarazi dutenez, gurasoei zuzenean helaraziko diete informazio hori.
Entrenamenduen hasiera datak
Bigarren Hezkuntzatik gorakoak izango dira entrenamenduekin hasten lehenengoak; hain zuzen bihar, irailak 7, ekingo diote denboraldiari.
Gainerako taldeak –igeri eskolako arratsaldekoak eta eguerdikoak– irailaren 16a, asteazkena, izango dute aurreneko eguna.