Xeye atletismo taldeko 16 urtez azpiko nesken eta mutilen talde banak Espainiako Kros Txapelketa jokatuko dute datorren igandean, hilak 23, Burgosko Atapuercan (Espainia). Hil honen aurreneko igandean jokatu zuten Lasarteko (Gipuzkoa) hipodromoan 69. Donostiako Nazioarteko krosa, eta Azkoiti-Azpeitiko korrikalariek han lortu zuten Espainiako txapelketarako sailkatzea; izan ere, Donostiako krosa Espainiako Txapelketarako puntuagarria izan zen.
16 urtez azpiko neskek hirugarren postua eskuratu zuten Lasarten, eta mutilek, bigarrena. Dena den, Ane Bosch korrikalari azkoitiarra podiumera igo zen orduan, hirugarren postua lortuta; bigarren urtez jarraian lortu du Boschek podiumera igotzea Lasarten.
Atapuercako XXI. Nazioarteko Krosean arituko dira Azkoitiko eta Azpeitiko korrikalariak; 3.250 metroko lasterketak jokatuko dituzte bi taldeek, biak goizeko aurreneko orduan. Mutilen taldea Julen Zialtzetak, Jakes Zubizarretak, Oier Arrizabalagak, Markel Lorenzok eta Unax Artetxek osatuko dute. Nesken taldea, berriz, Ane Boschek, Ane Arregik, Udane Nuinek, Laia Urrestillak, Ainhize Subinasek, Amaia Azkoitiak eta Intza Etxeberriak osatuko dute.