Duela 26 urte egin zituzten teniseko hiru pista Txerloian, eta ordutik haiek mantendu dituzte. Txerloia Tenis Klubaren esanetan, "oso zaharkituta" zeuden, ordea. "Arazoak sortzen ziren jokatzeko orduan, besteak beste, bote okerra egiten zuelako pilotak". Horietako bat duela urtebete inguru berritu zuten, eta, orain, gainerako biak konpondu dituzte. Gainera, pistak berritzearekin batera, sareak eta argindarreko kableak ere aldatu dituzte.
Tenisean jokatzeko pista berriekin, txapelketetan eta ikastaroetan murgilduta dabil Txerloia Tenis Kluba, hala nola, Azkoitiko Open-ean.
