Nire burutazio guztiak
arazo bihurtzen ditudanez,
gaixotu egin naiz,
baina burutazio guzti hauek
burutik kenduko dizkidan
sendagairik ez dagoenez,
gaixorik jarraitzen dut.
Gaixo jarraitzen dudala argudiatuz,
edonori edozer esaten
ausartzen naiz,
badakidalako inork ez didala ezer erantzungo.
Nire gaixotasunaren kontuarekin
besteak nire erara moldatzen zirela
konturatu nintzenetik,
edozein aitzakia bilatzen dut
gainerakoen arreta lortu asmoz,
atsegin dut beste guztiak
niri begira egotea.
Batzuek edozer egiten dute
inor ez gogaitzeagatik,
niri ez zait axola.
Denak nekatuko ditudala
jakinagatik ere,
neurean jarraitzeko asmoa dut,
honela behintzat
ez naiz bakarrik geldituko,
azkenean bakarrik utziko nautela
pentsatzen dudan arren.
Pentsatze hutsak izua sortzen dit!
Ez ahal zait halakorik suertatuko!
Gaur inongo minik
ez neukan arren,
izugarrizko buruko mina neukala esan
eta zorabiatu itxura egin ondoren,
ez naute bakarrik utzi.
Oraingoan ere lortu dut!
Horrela jarraitu behar!
Maite Arrate