Herriko dendetan erostearen garrantzia azpimarratzeko helburuz, Herriaren bihotza izeneko Gabonetako bideoa plazaratu du Herrixen merkatarien elkarteak. Azkoitiko merkataritzaren iragana eta oraina lotzen ditu ikus-entzunezkoak, belaunaldiz belaunaldi herritarren ondoan izan den merkataritzari aitorpena egiteko asmoz.
Herriko irudi zaharrei mugimendua eman die ekoizpenak, eta gaur egun lanean diharduten dendariek eskaintzen duten hurbiltasuna nabarmentzen du. "Argazki zaharretan bizi da gure lehen taupada. Gaurko kaleetan, berriz, indar berrituarekin jotzen jarraitzen du", adierazi du Herrixen merkatarien elkarteak.