Olvido Hernando oso gaztea zela etorri zen Azkoitira bizitzera. Bizilagun eta ezagun euskaldun asko izan ditu beti inguruan, eta euskara ikasteko jakinmina aspaldi piztu zitzaion. Hitz eta esamolde solteak ulertu bai, baina euskaraz hitz egiten hasteko pausua ematera ez zen ausartzen. Azkenean, AEK euskaltegian izen eman eta handik urte batzuetara Mintzalagun egitasmora batu zen. Egunez egun hizkuntza barneratzen eta ikasten joan da. Harremanak zabaldu ditu eta geroz eta jende gehiagorekin erabiltzen du euskara. Euskaraldian parte hartu bakarrik ez, hamaikakora ere batuko da. Aurten, gainera, ahobizi txapa jarriko du paparrean —aurreko bi edizioetan belarriprest rola hartu zuen—. Ariketa sozialak iraungo duen egunetan euskaraz egingo du lehen hitza, baita hortik aurrerakoa ere, ahal duen guztietan. Edonon, edonoiz eta edonorekin. Bere mezua, ondorengoa: "Lehen belarriprest izan nintzen, oraingoan ahobizi!".
Hernandorekin batera, orain arte, Igor Zubeldia, Paki Fernandez, Iban Garate, Firdaus Mohammed Awal, Julen Alberdi, Ixabel Jauregi eta Adrian Chohan dira hamaikakora batu diren herritarrak.
Hitzez ekiteko garaia da lelopean egingo da aurtengo Euskaraldia, eta hizkuntza erabileran eragitea xede duen ariketa kolektiboan parte hartzera deituta daude 16 urtetik gorako euskal herritarrak. Norbanakoen izena emateko epea zabalik dago, eta parte hartu nahi dutenek online eman ahal dute izena, Euskaraldiaren webgunearen bidez.
Horrez gain, aurrerantzean Azkoitian antolatutako ekitaldietan ere horretarako aukera jarriko da. Euskaraldiaren hirugarren edizioan ere mota guztietako entitateek (elkarteak, enpresa handiak, taldeak, dendak, federazioak…) parte hartuko dute ariguneen bidez. Ariguneetan (euskaraz lasai aritzeko guneak) herritarrek ariketa taldean egiteko aukera izango dute. Azkoitian, aurten, 50 arigune eratu dira, iaz jarritako erronka beteta —2020an 32 izan ziren—.
Euskaraldiako Azkoitiko hamaikakoa
Igor Zubeldia, Realeko jokalaria (Ahobizi)
Paki Fernandez, BM supermerkatuko kutxazaina (Belarriprest)
Iban Garate, aurkezlea eta aktorea (Ahobizi)
Firdaus Mohammed Awal, AEK-ko ikaslea (Ahobizi)
Julen Alberdi, Txikia IV.a aizkolaria (Ahobizi)
Ixabel Jauregi, euskaltzalea (Ahobizi)
Adrian Chohan Madinabeitia, Udaltzaina (Ahobizi)
