Euskal kontzientzia astintzea. Helburu hori lortzea nahiko luke Ixabel Jauregi euskaltzale nekaezinak Euskaraldiaren hirugarren edizio honetan. Ikastolako irakaslea, euskararen sustatzailea, bertsozale amorratua, kultur eragilea, mintzalaguna… zenbatezina da Jauregik euskararen alde egindakoen zerrenda, eta horregatik, Azkoitiko hamaikakoan ondo merezitako lekua izango du. Aurreko edizioetan bezala, ahobizi rola hartuko du, eta egunerokoan, urteko 365 egunetan, bere egiten duen jarrerari eutsiko dio. Euskaraz lehen hitza, eta hortik aurrerakoa ere bai, parez pare duenak ulertzen duenean. Edonon, edonoiz eta edonorekin. Kezkaz begiratzen dio euskararen egungo egoerari, eta lozorroan dagoen kontzientzietan eragitea nahiko luke Euskaraldiak. Mezu hau utzi digu: : "Euskaraldiak balio dezala, lozorroan dagoen euskal kontzientzia esnatzeko".
Jauregirekin batera, orain arte, Igor Zubeldia, Paki Fernandez, Iban Garate, Firdaus Mohammed Awal eta Julen Alberdi dira hamaikakora batu diren herritarrak.
Hitzez ekiteko garaia da lelopean egingo da aurtengo Euskaraldia, eta hizkuntza erabileran eragitea xede duen ariketa kolektiboan parte hartzera deituta daude 16 urtetik gorako euskal herritarrak. Norbanakoen izena emateko epea zabalik dago, eta parte hartu nahi dutenek online eman ahal dute izena, Euskaraldiaren webgunearen bidez.
Horrez gain, aurrerantzean Azkoitian antolatutako ekitaldietan ere horretarako aukera jarriko da. Euskaraldiaren hirugarren edizioan ere mota guztietako entitateek (elkarteak, enpresa handiak, taldeak, dendak, federazioak…) parte hartuko dute ariguneen bidez. Ariguneetan (euskaraz lasai aritzeko guneak) herritarrek ariketa taldean egiteko aukera izango dute. Azkoitian, aurten, 50 arigune eratu dira, iaz jarritako erronka beteta —2020an 32 izan ziren—.
Euskaraldiako Azkoitiko hamaikakoa
Igor Zubeldia, Realeko jokalaria (Ahobizi)
Paki Fernandez, BM supermerkatuko kutxazaina (Belarriprest)
Iban Garate, aurkezlea eta aktorea (Ahobizi)
Firdaus Mohammed Awal, AEK-ko ikaslea (Ahobizi)
Julen Alberdi, Txikia IV.a aizkolaria (Ahobizi)
