Igor Zubeldia futbolariak 300 partida jokatu ditu Realarekin. Azkoitiarra joan den zapatuan heldu zen langa horretara, Atletico Madrilen aurka jokatutako partidan, txuri-urdinek Metropolitano estadioan 4-0 galdu zuten lehian.
Zubeldiak, guztira, 233 partida jokatu ditu Espainiako Ligan, 37 dema Europa mailako txapelketetan (Txapeldunen Liga eta Europa League), 29 lehia Espainiako Kopan eta bat Espainiako Superkopan. Txuri-urdinen atzeko lerroko jokalari ezinbestekoenetako bat da Zubeldia, eta datuek berresten dute hori; izan ere, azken zortzi denboraldietan 30 partidatik gora jokatu ditu hark. Hain justu, iaz iritsi zen denboraldi bakar batean partida gehien jokatzera, Realak Txapeldunen Liga jokatu zuen denboraldian, hain zuzen; 43 partida jokatu zituen orduan Zubeldiak.
2015ean igo zuten futbolari azkoitiarra gazteen mailatik Sansera, eta zehazki, 2015-1016 denboraldian egin zuen debuta Realaren lehen taldearekin, 2016ko maiatzaren 13an. 19 urte besterik ez zituela, Valentziaren aurka jokatu zuen azkoitiarrak Mestalla futbol zelaian. Zubeldiak duela bi urte berritu zuen azkenengoz kontratua Realarekin 2029ko ekainera arte.
300 partida jokatu dituela eta, Realak elkarrizketa egin dio futbol jokalari azkoitiarrari. Honako bideo honetan ikus daiteke bideo elkarrizketa: