Anaitasuna Kakute xake taldeak XXI. San Balentin Berrio-Otxoa xake txapelketan parte hartu zuen joan den zapatuan, Elorrion (Bizkaia). Guztira, hamabost taldek lehiatu zuten txapelketa, eta azkenean, Abadiño taldeak irabazi zuen, 48,5 punturekin. Elorrioko Zaldi Baltza A taldea sailkatu zen bigarren 45,5 punturekin, eta Santurtzi hirugarren, 44 punturekin.
Anaitasuna Kakute Judith Goenagak, Lucia Valorrek, Jose Joaquin Larrañagak eta Juan Carlos Valorrek ordezkatu zuten, eta Azkoitiko taldea bederatzigarren sailkatu zen, 24 puntu batuta. Elorrioko txapelketa klasikoetako bat da Anaitasuna Kakuterentzat, ia urtero parte hartu baitu han. Era berean, Elorrioko taldeak ere Azkoitia Hiria xake txapelketan parte hartu ohi du. Hain justu, Egoitz Irure da Elorrioko xake taldeko kideetako bat; Anaitasuna Kakuten historia handiko ibilia egindakoa da hura.
Bestalde, Lucia Valorrek 14 urtez azpiko Espainiako Txapelketa prestatzeko baliatu zuen Elorrioko txapelketa; izan ere, hilaren 17an Salobreñan (Espainia) jokatuko du lehia. Datozen egunetan, prestaketa lanak biderkatu egingo ditu hark, txapelketara punturik onenean heltzeko asmoz.
