Herritar batek kexa bidali du Gukaren erredakziora, duela bizpahiru aste Txalon Erreka inguruan sastrakak moztu zituztela eta ebakitako zatiak hantxe utzi zituztela esanez. Haren hitzetan, errekako eta bide bazterreko sastrakak ebaki zituzten, eta "jasoko zituztela" uste bazuten ere, hiru aste igarota toki berean jarraitzen dute. "Dena narrats-narrats utzi dute, errekara botata". Kexa bidali duen herritarrak jakinarazi duenez, gainera, euri zaparrada handiren bat botatzen duenean, erreka "oztopatuta" geratzen dela esan du.
Herritarraren ustez, "oso ondo" dago herriaren erdigunea, eliz ataria eta beste leku batzuk txukun-txukun jartzea "festen atarian itxura ona emateko", baita Txalon Errekako bial berria "primeran mantetzea" ere, baina "auzo zaharrak baztertuta, narrats eta gaizki zainduta" dituztela salatu du.