2022ko ekainaren amaieran 1.195 langabetu zenbatu dira Urola Erdian, eta azken hilabeteetako joera baikorrari jarraipena eman zaio. Lanbide euskal enplegu
zerbitzuaren datuen arabera, 2022ko ekainean iaz hilabete berean baino 83 langabetu
gutxiago zenbatu dituzte eskualdean, %6,5 gutxiago.
Era berean, Iraurgi Berritzenen estimazioen arabera, Urola Erdiko langabezia indizea %7,5ean kokatu da ekainaren bukaeran, %5,7 gizonezkoetan eta %9,6 emakumezkoetan. Gauzak horrela, eskualdeko langabezia indizea, Gipuzkoakoa (%8,3) baino ia puntu bat
txikiagoa da.
Lan merkatuaren bilakaera positiboa
Era berean, lan merkatuak martxoa eta ekaina bitartean izan duen bilakaerari erreparatuz gero, oro har, bilakaera positiboa ikus daiteke adierazle ezberdinetan. Besteak beste, honako puntuak azpimarratu daitezke:
- Urola Erdian zenbatutako afiliazio kopuruari dagokionez, bilakaera positiboa
erregistratu da urteko bigarren hiruhilabetean. Ekainaren amaieran 13.331 afiliatu
zenbatu dira eskualdean, martxoaren amaieran baino 174 gehiago. Azken
hilabeteetan erregistratu den bilakaera positiboari esker, iaz hilabete berean
baino 513 afiliatu gehiago zenbatu dira eskualdean, %4ko hazkundea. Igoera
hori, batez ere, industrian eta zerbitzu sektoreetan eman da. - Kontratuen bilakaerari dagokionez, 2022ko apirila eta ekaina artean 1.898
kontratu zenbatu dira Urola Erdian, iaz hiruhileko berean baino %6,8 gehiago.
Kontratu gehienak zerbitzuetan zenbatu dira, kontratu guztien %57,5 hain
zuzen ere. Bestalde, hiruhilekoan erregistratu diren kontratuen herena
industriara bideratu da, guztira 642 kontratu. - Diru sarrerak Bermatzeko Expedienteei (DBE) dagokionez, Urola Erdian
zenbatutako expediente kopuruak beheranzko joeran jarraitzen du; guztira,
518 expediente zenbatu dira, iaz hilabete berean baino 47 gutxiago. - Ekainaren amaieran, indarrean ziren hiru Aldi Baterako Enplegu Erregulazio Expediente (ABEEE) zenbatu dira eskualdean. Expediente horiek, guztira, 111
langileri eragiten diete.
Iraurgi Berritzenek eskualdeko errealitate sozioekonomikoaren nondik norakoak aztertzen jarraituko du datozen hilabeteetan, uneoro eskualdeko lan merkatuaren bilakaera ezagutzeko eta eskualdeko sustapen politikak uneko beharretara egokitzeko asmoarekin.
