Azkoitia-Azpeitia ISB taldeak Challenge EL ligako bigarren jardunaldiko neurketa jokatuko du igandean, urriak 3, Azkoitiko Elkarguneko kantxan. Andoni Lazkanoren taldearentzat etxeko lehen neurketa izango da igandekoa, eta Alter Enersun Al-Qazeres Extremadura izango dute aurrean.
Bi taldeek galdu egin zuten denboraldiari ekiteko lehen partidan. Recoletas Zamora taldea izan zuten aurkari extremadurarrek etxean, eta 61 eta 83 galdu zuten. ISBk, aldiz, Raca Granada taldearekin neurtu zituen indarrak Granadan (Andaluzia, Espainia), eta 73 eta 47 galdu zuten neskek.
Partidarako informazioa
Edukiera aldaketak direla eta, ISBko bazkideek ez dute sarrera hartu beharrik izango aurrerantzean. Hori horrela, bazkideek txartela erakustea aski izango dute partidak ikusi ahal izateko. Halere, klubak lehentasunen arabera ahalbidetuko du kantxarako sarrera.
Bazkideek izango dute lehentasuna, eta ondoren, haiekin doazen haurrek. Bazkideen ostean, sarrera erosten duen orok izango du kantxara sarrera bermatuta, eta azkenik, klubeko jokalari orok. Era berean, edukiera kontrolpean izanez gero eta kantxan jende gehiagorentzako lekua balego, gaztetxoei ere sartzen utziko die ISBk.