Harrotasunaren Egunaren bezperan, Euzko Gaztedi-EGIk LGTBIQ+ kolektiboaren eskubideen aldeko borroka irmoa eta etengabea defendatzen duela gogorarazi nahi du. Guretzat LGTBIQ+ pertsonen eskubideena ez da hauteskunde-kanpainetan edo festa koloretsuen sinbolismoan oinarritutako gaia. Eskubide horiek praktikan jarri behar dira, eta horretarako, politikek koherentzia, irmotasuna eta errealismoa izan behar dute.
LGTBIQ+ eskubideen aldeko borroka eguneroko konpromisoa da, eta ezinbestekoa da erabaki politikoetan islatzea. Mozioak ez dira sinbolikoak, ezta kolore koloretsuen kanpaina bateko adierazpen hutsa ere. LGTBIfobiaren aurkako prebentzioa eta babes instituzionala politika publiko sendoetan eta eraginkorretan oinarritzen dira, eta horretarako, ekintza koherenteak behar dira.
Hori dela eta, Euzko Gaztedi-EGI-k Azkoitia Bai-ren jarrera salatu nahi du, azken udalbatzarrean LGTBIQ+ eskubideen alde aurkeztutako mozioaren aurka bozkatu izanagatik. Azkoitia Baik erantzukizun politikoak ditu hauteskundeetara aurkezten den unetik eta hautetsi bihurtzen denetik. Ez da onargarria hauteskunde kanpainetan edo ospakizunetan LGTBIQ+ eskubideak defendatzea, eta gero, erabaki politikoetan horiek alde batera uztea.
Udal aurrekontuetan 20.000 euroko diru-partida bat proposatu zen LGTBIQ+ diagnostiko bat egiteko, herriko egoera zehatz-mehatz aztertzeko eta politika publiko eraginkorrak sortzeko lehen urrats gisa. Baina, berriro ere, Azkoitia Bai-k aurrekontu horien aurka bozkatu zuen, eta horrela, partida hori ez zuen babestu.
LGTBIQ+ pertsonen eskubideen aldeko borroka ez da kanpaina politiko edo sinbolismo hutsa. LGTBIfobia eta horren inguruko erasoak egon daitezke gure herrian ere, Azkoitian, eta horrek are garrantzitsuago egiten du benetako konpromiso politikoa eta babesa, bai instituzionalki, bai sozialki. Ezinbestekoa da eraso horiek prebenitzea eta LGTBIQ+ pertsonen eskubideak zaintzea.
Azkoitia Bai-k, iaz ere Harrotasunaren Egunaren inguruko mozioaren aurka bozkatu eta gero, argazki bat atera zuen ortzadar banderaren ondoan, ezer gertatu ez balitz bezala. Hori gure ustez hipokrisia hutsa da, eta benetako konpromiso falta adierazten du; argazkia bakarrik nahi zuten.
Gai horri bueltan benetako konpromisoa eskatzen dugu. Ez dugu onartzen irudi hutsa edo LGTBIQ+ eskubideen aldeko borroka eslogana erabiltzea, eta ondoren, erabaki politikoetan konpromiso hori alde batera uztea.
Horregatik, Harrotasunaren Egunean, ez dugu onartuko LGTBIQ+ eskubideen aldeko benetako konpromisorik erakutsi ez duten ordezkari politikoak bandera ortzadarraren ondoan agertzea. Koloreek ez dute apaingarririk izan behar; eskubideen aldeko borrokaren ikurrak dira, eta horrek, ekintza koherenteak eskatzen ditu.
Gazteak garelako, eta pertsona librez osatutako Euzkadi aske eta seguruan sinesten dugulako.