Batzokixen Berriketan egitasmoko bosgarren gonbidatua izan da Xabier Aierdi zeberioarra, eta aurrera begira migrazio mugimenduak izango duen nondik norakoaz eta honek sortuko dituen erronkez jardun zuen atzo. Erronka hauei modu egokian heltzeko, "izaera komunitario" baten beharra azpimarratu zuen Begirune fundazioko presidenteak.
Aierdiren hitzetan, "gure herriko biztanleria piramidea aztertuta, datozen urteetan industrian sortuko den zuloa bete eta zaintzan izango den beharrari aurre egiteko, Euskadin jaioko direnak ez dira nahikoa". Beraz, baieztatu zuen guztiz beharrezkoa izango dela "Euskadira iristen direnei formakuntza egoki bat ematea" eta "lan munduan sar daitezen lan egitea".