Inaxi Bereziartua Eizagirre

Ezin ahaztu Endaizpe nola
epeltzen zuen egurrak,
zure ogia, karameloak
eta su gaineko hurrak,
"Txalo pin txalo" kantatuz dantzan
zure bi esku ahurrak,
mende oso batek zure azalean
ehundutako ximurrak...
Azken arnasak nahiz ez dakartzan
sarri sentipen xamurrak,
une goxoen zaporea du
gure arteko agurrak:
muxu handi bat, ikusi arte
goxo har zaitzala lurrak.