Kapsula Kuantikoaren unitate mugikorrak Azkoitian egin du geldialdia

Ane Olaizola

Autobusak ateak irekitzearekin batera elkartu diren herritarrak. (Ane Olaizola)

Fisika eta teknologia kuantikoak herritarrei modu irisgarrian, parte hartzailean eta erakargarrian hurbiltzeko asmoz prestatu du Jaurlaritzak egitasmoa, eta autobusa eliz atarian izango da goizez zein arratsaldez. Ikus entzunezkoak eta panel interaktiboak ikusi ahal izango dira, konplexuak izan daitezkeen edota eguneroko bizitzatik urrun dauden kontzeptuak ulertzen laguntzeko.

Eusko Jaurlaritzaren Zientzia, Unibertsitate eta Berrikuntza Sailak sustatutako Kapsula Kuantikoa Azkoitira iritsi da gaur, osteguna. Fisika eta teknologia kuantikoak herritarrei modu irisgarrian, parte hartzailean eta erakargarrian hurbiltzea da Jaurlaritzak abiatu berri duen egitasmoaren helburua, eta hori hala izanik, herriz herri dabilen unitate mugikorrak eliz atarian egin du geldialdia. 

09:00etan zabaldu dituzte autobusaren ateak, eta hainbat lagun bertaratu dira Jaurlaritzak prestatutako esperientziaren bidez fisika kuantikoaren oinarrizko hainbat printzipio eta eguneroko bizitzan dauden aplikazioak ezagutzeko. Goizean, 14:00etara bitartean izango da zabalik, eta aurrez erreserba egindako herritarrek gutxi gorabehera 50 minutuko saioak jasoko dituzte. Arratsaldean, berriz, 16:00etatik 19:00etara, 30 minutuko bisita egin ahalko dute herritarrek, aurrez erreserbarik egin gabeko saioetan. Ikus entzunezkoak eta panel interaktiboak ikusi ahal izango dituzte haiek bisitan, konplexuak izan daitezkeen edota eguneroko bizitzatik urrun dauden kontzeptuak ulertzen laguntzeko.

Gaurko ametsak biharko albiste izan daitezen, beharrezkoa dugu zure babesa.


Egin bazkide