Azkoitri triatloi elkarteko kide Jon Albizuri Hawaiiko Munduko Ironman txapelketan parte hartu du joan den asteburuan, eta bere adin tartean, hau da, 45 eta 49 urte bitarteko gizonen artean, 18. postuan sailkatu da azkoitiarra. Guztira, 1.709 triatletak lortu dute helmugaratzea, eta horietatik, 266. postuan egin du Albizurik, ibilbidea bederatzi ordu eta 34 minututan osatuta.
Kona irlan jokatu duten txapelketan lehiatu diren kirolariek 3,8 kilometro igerian, 180 kilometro bizikletan eta 42,2 kilometro korrika egin behar izan dituzte. Azkoitiarrak sare sozialetan adierazi duenez, igerian emaitza "txarra" lortu du, eta ordubete eta zazpi minutu behar izan ditu itsasoan 3,8 kilometro egiteko; txirrindularitzako tartea, berriz, "gogorra" egin zaio psikologikoki, haizea kontra izan duela azalduta. Ostera, maratoi distantzia "txukun" atera zaiola adierazi du, irla horretako baldintzak kontuan hartuta.