Ados Pilota klubak antolatutako III. Udara Caixabank pilota txapelketaren barruan eskuz binakako bi partida jokatuko dituzte datorren igandean Gurea pilotalekuan. 11:30ean hasiko da aurreneko neurketa, eta Iturriaga-Arrastia eta Gomez-Ruiz pilotariak arituko dira nor baino nor. Bigarrenean, berriz, Oskoz-Perez eta Aldaregia-Mendiburu bikoteak lehiatuko dira.
Joan zen uztailaren 16an hasi zuten pilotariek txapelketa Uztarrozen (Nafarroa), eta guztira, sei bikotek parte hartu dute. Sailkapeneko aurreneko bi postuak lortzen dituztenek urriaren 3an jokatuko dute finala, Iruñeko Labrit pilotalekuan. Antolatzaileen arabera, txapelketa indarra hartzen ari da azken urteetan, eta "erreferente" bihurtu da.