Datozen hilabeteetan Elkargunean emango dituzten ikastaroen eta tailerren izen emateak zabalik ditu Zubiaurre-Elkarguneak. Batetik, arteterapia eta sormen tailerrenak ditu irekita, eta bestetik, haurren igeriketa ikastaroarena.
Azkoitiko Gazteria sailak antolatu ditu arteterapia eta Sormenarekin biraka izeneko lantegiak. Bi kasuetan, irailaren 20ra arte izango dute zabalik LH 1 mailatik LH 6 mailara arteko ikasleek izen ematea, eta 68 euro ordaindu beharko dute. Arteterapia lantegiak astearteetan eskainiko dituzte Elkarguneko Teknogunea lantegia gelan; urriaren 6an, 13an, 20an eta 27an, azaroaren 3an, 10ean, 17an eta 24an, eta abenduaren 1ean, 8an eta 15ean. Saio horiek guztiak 17:15etik 18:45era bitartean gauzatuko dituzte. Dena den, Elkarguneak jakinarazi du lantegia egin ahal izateko gutxieneko taldea osatu beharko dela. Honako lotura honetan eman daiteke ikastaro horretarako izena.
Sormenarekin biraka lantegia, berriz, asteazkenetan egingo dute Elkarguneko Eskuarte gelan, 17:15etik 18:45era. Urriaren 7an, 14an, 21ean eta 28an, azaroaren 4an, 11n, 18an, eta 25ean, eta abenduaren 2an, 9an eta 16an izango dira saioak. Ikastaro honetarako ere gutxieneko taldea osatu beharko da, eta horretarako, honako lotura honetan eman beharko da izena.
Haur igeriketa ikastaroak, bestalde, irailaren 21ean hasiko dira eta abenduaren 18an amaitu. Elkarguneak azaldu duenez, ikastaroak 17:30etik 19:00etara bitartean eskainiko dituzte, baina saioak ordu erdikoak izango dira. Gainera, nabarmendu dute mailak eta ordutegiak izena emandakoen eskaeren arabera antolatuko dituztela; izan ere, igerilari bakoitzak duen gaitasunaren arabera, lau mailatan bereiziko dituzte izena emandako herritarrak. Honako lotura honetan eman beharko da haurren igeriketa ikastarorako izena.