Jose Joakin Larrañaga izan zen atzo nagusi Azkoitiko Kultur Etxean jokatu zuten Blitz Anaitasuna Kakute xake txapelketaren 30. edizioan. Jokaldi bakoitza egiteko hiru minutu eta bi segundo izan zituzten jokalariek, hori izan zen atzoko saioko berezitasuna, eta jokatutako bederatzi partidan 7,5 puntu pilatuta, Larrañagarentzat izan zen garaipena. Puntu erdi gutxiago batu zituzten bigarren eta hirugarren gelditu ziren Juan Carlos Valorri eta Juan Cruz Fernandezi.
Guztira 25 lagunek parte hartu zuten atzoko Azkoitiko saioan; herrikoak horietako asko, baina baita Eibartik (Gipuzkoa) joandakoak ere. Lehiari ekin aurretik minutuko isilunea egin zuten denek duela egun batzuk Hondarribian (Gipuzkoa) hildako Mariano Otero xakelaria gogoan.
Ostiralean, berriz, Azkoitiko hainbat xakelari gaztek Bergarako (Gipuzkoa) IV. Gazteen Xake Txapelketa jokatu zuten. 24 lagunek parte hartu zuten guztira, eta irabazlea Durangoko (Bizkaia) Ekain Bengoetxea izan bazen ere, azkoitiarrek oso lan txukuna egin zuten. Luken Pascualek bigarren lekuan bukatu zuen lehia, Aritz Hidalgok seigarrenean eta Bera Pascualek zazpigarrenean.
