Datorren hilean urtebete osatuko du Gurea udal pilotalekuaren ibilbide berriak. Izan ere, iaz azpiegitura horren kudeaketa eskuz aldatu zuten, eta inaugurazioan egin zuten moduan, pilota eta bertsoa uztartuta ospatuko dute lehenengo urteurrena, uztailaren 3an, ostiralez.
Hango arduradunek bertso pilota jaialdia antolatu dute egun horretarako, eta 21:00etatik aurrera, gizonen zein emakumeen pilota partida banaz eta bertso saioaz gozatu ahal izango dute bertaratzen direnek. Pilota partidei dagokienez, emakumeetan Salsamendi-Menzabal bikotea Zabaleta-Erasunen aurka arituko da; eta gizonetan, Mikel Goñik eta Erasunek osatutako bikotea Urmenetaren eta Juaristiren aurka arituko da nor baino nor. Beñat Gaztelumendi eta Iker Zubeldia bertsolari-botilleroek girotuko dituzte partida horiek.
Jaialdi horretara joateko, bost eurotan salduko dituzte sarrerak, eta aurrez eros daitezke frontoian bertan.