Giza elkartasunaren festa ospatuz agurtuko dute Isilune Zirkulua antolatzen duten eragileek aurtengo ikasturtea. Etzi, hileko hirugarren osteguna izanik, egingo dute udako opor aurreko azken bilkura, eta berezia izango da: besteak beste, bertsoak, hitzartzeak eta abestiak eskainiko dituzte, eta mokadu batekin agurtuko dute elkar. Gainera, ordubete aurreratu dute ekaineko hitzordua, eta 20:00etan egin beharrean, 19:00etan bilduko dira, plazan. Herritar guztiak gonbidatu dituzte saiora.
"Giza eskubideen urraketak" salatzeko eta "gizatasuna plazara" ateratzeko asmoz, bost elkartek hilero antolatzen dute Isilune Zirkulua egitasmoa: Gernika-Palestina taldeak, Darahli elkarteak, Marea Urdina elkarteak, Loiolako Jesusen Lagundiak eta Azkoitiko Parrokiak.