Jaurlaritzaren kriminalizazioaren aurrean eskubide zibil eta politikoak defendatu lelopean, hainbat eragilek manifestazioa deitu dute larunbaterako Bilbon. Hara joateko eta handik itzultzeko autobusak antolatu dituzte, eta dagoeneko eman daiteke joan-etorrirako izena Azkoitiko Dean eta Azpeitiko Haginpe tabernetan.
Larunbatean Zestoatik, Azpeititik eta Azkoititik pasatuko da Bilborako autobusa, honako ordutegi honetan: 15:00etan Zestoako autobus geltokitik; 15:15ean Azpeitiko anbulatorioaren aurretik; eta 15:30ean Azkoitiko Eroski saltoki txikiaren aurretik.
"Ertzaintzaren inpunitatea" salatzea eta "Jaurlaritzaren kriminalizazioaren aurka" protesta egitea dira manifestazioaren helburu nagusiak. "Errepresio betean murgildu gaituzte estatuek, eta horren arduradunak seinalatzea urgentziazkoa da", esan dute manifestazioaren antolatzaileek. Hori hala, "eskubide zibilen eta politikoen aurkako eraso gehiago egon ez daitezen" mobilizatuko direla azpimarratu dute.
Manifestazioaren deitzaileak honako hauek dira: Euskal Herriko Global Samud flotilla, Amaya Zabarte, Justizia Aranarentzat plataforma, Gazte Koordinadora Sozialista, Errekaleor Bizirik, Azpeitia Errepresioaren Aurka, Herri Norte Taldea, Bultzada Txuri-Urdina, Iraultza 1921, Euskal Herriko Etxebizitza Sindikatu Sozialista, Euskal Herriko Etxebizitza Sindikatuen Sarea eta Mbolo Moyo Doole.