Azkoitiko Irakurle Taldeak etena egingo du udan, eta liburu berrien inguruan solasteko saioekin itzuliko da oporren ostean. Ikasturte berriko lehenengo saioa irailaren 22an izango da Elkarguneko Oteiza aretoan, 19:00etan hasita, ohi den bezala.
Saiora bertaratzen direnak Terraza debekatua. Haremeko neskato baten istorioak liburua komentatuko dute, Fatima Mernissik idatzitakoa eta Edurne Lazkanok euskaratutakoa. Beste urte batez ere, Iñigo Aranbarri idazle eta dinamizatzailea izango da saioa gidatzeaz arduratuko dena, eta guztien artean aletuko dute 2025ean kaleratutako liburua.