Gimnastika erritmikoaz gozatzeko aukera izango da igandean, Azkoitian. Gimnastek taldekako Euskadiko Txapelketa jokatuko dute Elkargunean, 10:30ean hasita.
Guztira, 48 gimnastek parte hartuko dute txapelketan; Tolosa, Donostia, Izarleku, Beti Aurrera, Beti Ritmica, Sakoneta, Bitxiak eta Oskitxo klubetakoak izango dira guztiak. Euskadiko Gimnasia Federazioak antolatu du lehiaketa, eta Azkoitiko Zubiberri kluba kolaboratzailea izan da.
Horrez gain, Euskadiko Amateur Txapelketa ere jokatuko dute Zubiberri taldeko gimnastek larunbatean, Durangon. Goizeko jardunaldian, kadete mailako A taldean Ane Illarramendik eta Elene Astiazaranek parte hartuko dute arte uztaiarekin, eta Maite Rodriguezek zein Helene Murillok mazoekin. Arratsaldeko jardunaldian, berriz, kadeteen A multzoan bost pilotekin egingo dute proba Maialen Saenzek, Haizea Astigarragak, Intza Elortzak, Eire Segurolak eta Helene Murillok. Senior mailari dagokionez, A taldean arituko dira, Aitana Sanchez, sokarekin, eta Garazi Urdalleta, mazoekin.