Oteiza pilota elkarteko pilotariek eta palistek atzo, ostirala, jokatu zituzten Gipuzkoako Herriarteko Pilota Txapelketaren final zortzirenetako itzulerako partidak. Gomazko palistek etxean jokatu zuten kanporaketa Zarautzen aurka, 19:00etan hasita. Aldiz, pilotariek Zegamako Toki Alai pilotalekuan jokatu zituzten partidak, 20:15ean hasita. Biek garaipen bana erdietsi zuten.
Azkoitiko gomazko palistek bi partida irabazita garaitu zituzten Zarauzkoak. Lehen partidan, kantxa osoan, 20-9 irabazi zuen Iker Epeldek. Bigarren partida, binakakoa, Marcos Azpirozek eta Igor Larrañagak jokatu zuten, baina horiek 15-20 galdu zuten norgehiagoka. Azkenik, zazpi koadroren barruan lehiatu zen Jokin Aizpuru, eta hark 20-6 irabazi zuen.
Gomazko paletan bezala, eskuzkoan ere bi partida irabazi zituzten Azkoitiko ordezkariek, Zegamakoen aurka. Kadeteen mailan, Joanes Juaristik eta Denis Santosek ezin izan zuten Zegama mendean hartu, eta hark 22-6 irabazi zuen aurreneko partida. Ordea, oso bestelako norgehiagokak jokatu zituzten gazteen zein nagusien mailetan: gazteetan, Julen Etxanizek eta Jon Arregik 7-22 irabazi zuten, eta nagusietan, Azkoitikoak aise nagusitu ziren kantxan, Mikel Aranbarrik eta Alex Juaristik 2-22 irabazi baitzuten partida.
Horrenbestez, Oteizako bi taldeek final laurdenetara sailkatzea lortu dute. Datorren asteburuan, arerio gogorrak izango dituzte biek ala biek: eskuzko taldeak Oiartzunen aurka neurtu beharko ditu indarrak hango frontoian, eta gomazko palistek oraindik lehian sartu ez den Aia izango dute zain.
(Argazkiak: Iraia Oteiza eta Oteiza pilota elkartea)