Azkoitiko Udalak jakinarazi duenez, hilero eskainiko dute herrian NA eta pasaportea ateratzeko nahiz berritzeko aukera. Erakundeak nabarmendu du, aurrerantzean "hileroko maiztasunarekin" etorriko dela Espainiako Poliziaren unitate mugikorra Azkoitira.
Udaletxeko Arreta Bulegora joanda edota hango 943-08 00 80 telefono zenbakira deituta eskatu beharko da NAri edota pasaporteari dagozkien aldaketak egiteko hitzordua. Hilabete bakoitzean "aldiro 48 hitzordu" emango dituzte, baina eskuratu edota berritu nahi den dokumentu bakoitzarentzat "hitzordu bana" behar da. "Norbaitek NA eta pasaportea, biak, behar baditu, bi hitzordu erreserbatu beharko ditu", azaldu du udalak.
Zerbitzua aurrez aurrekoa da eta tasak ordaindu behar dira: 12 euro ordaindu behar da NAren kasuan, eta 30 euro, pasaportea egiteko. Bihar, maiatzaren 21ean, izango da unitate mugikorra Azkoitian, eta egun hori igarotakoan irekiko die udalak herritarrei ekainerako txanda hartzeko aukera.