Ostarteak eta euri zaparradak tartekatuz jokatu dituzte goizean Azkoitiko V. Duatloi Txikiko probak, baina eguraldiak ez ditu haurrak kikildu, dozenaka parte hartzaile elkartu baititu beste behin egitasmoak.
Azkoitri triatloi klubak antolatuta, eskola kirolaren barruan jokatu dute duatloi inklusiboa Azkoitiko zein Azpeitiko haurrek, eta horiek Trenbidearen Zumardiaren eta Juin Txiki industrialdearen inguruan aritu dira bizikletan zein korrika. Eskola Kirolean izena emanda dauden 8 eta 11 urte arteko haurrek parte hartu dute bertan, eta horiek adinka banatuta gauzatu dituzte lasterketak, 10:30etik aurrera.